Hverjum skal trúa? Bjöggi segir ekki ég,Dabbi segir ekki ég,Allir segja ekki ég....

Horfði á Kastljós í kvöld þar sem Sigmar fékk Björgólf í viðtal, og mér fannst Bjöggi virka frekar sannfærandi. En það er nokkuð sama hver kemur í viðtal og hvar, flestir mjög sannfærandi og bera litla sem enga ábyrgð. Að mínu viti, sem er afar takmarkað tel ég að Seðlabankinn og ríkisstjórnin beri alla ábyrgð á hvernig komið er fyrir þjóðarskútunni, stjórnin átti að vera búin að gera ráðstafanir til að hægja á starfsemi Útrásarmanna fyrir löngu því hún hefur verið vöruð margoft við, en hundsað allar viðvaranir og sagt allt vera í stakasta lagi. Og það læðist að manni sá grunur að Dabbi seðla hafi viljað bíða átekta til að ná sér niðri á ákveðnum aðilum, sem aftur segir mér hvernig D.O. er í mínum huga, og jafnvel flestra Íslendinga.

Það fyrirbæri er að fárra skapi

finnast um það dæmi forn og ný.

Að hálfu leyti maður, hálfur api

og hugarfar og hegðun eftir því.

 Ef svo ótrúlega vildi nú til að þetta lið sem hefur setið við völd áttaði sig á því hvað orðið ábyrgðartilfinning táknar, að ég tali nú ekki um sómatilfinningu eða réttlætiskennd, þá myndi það segja af sér strax. En sennilega er best að þetta fólk moki flórinn sjálft og hreinsi aðeins upp eftir sig skítinn sem er orðinn allverulegur, því hver fengist til að taka við margstrandaðri og illa laskaðri skútu.

Ég er andskoti hræddur um að það verði ekki auðvelt fyrir nýjan skipstjóra sem tæki við liðónýtu skipi að  manna það svo vel væri. Til sjós er lögmálið Gott skip góð áhöfn,Lélegt skip léleg áhöfn.
 Sama lögmál gildir einnig til lands. Ég held að besta lausnin sé að  það verði kosningar í vor, og nýrri skútu með nýrri áhöfn hleypt af stokkunum.

Athugasemdir

[Víðir Benediktsson, 14.11.2008 kl. 07:15]

Björgólfur sagði að nóg væri til fyrir þessum innistæðum. Nokkrum mínútum fyrr sagði Ingibjörg Sólrún á Stöð 2 að það vantaði 100-400 milljarða. Að minnsta kosti annað þeirra lýgur, en hvort?